السلام عليكم ورحمة الله وبركاتة
انا انهارده قررت انى اكتب عن عمرو خالد الراجل الى فعلا لقيتو بدا العمل من اجل مصر وبدا الاهتمام بغلابة مصر
انا اتفرجت على حلقة بكره احلى الى اتذاعت امبارح وبصراحة عندى كلام كتير عاوز اقولة من ايجابيات وسلبيات
اولا هابدا بالسلبيات
الحلقة امبارح كانت بتتكلم عن العشوائيات وكان بيتكلم مع ناس من منطقة بطن البقرة بصراحة
اول واحد استضافو كان كلامو جميل جدا والراجل بجد عندو حق يقول اكتر من كده لــــــكــــــن
عمرو خالد كان واضح جدا انو بيمثل وفريق المنتاج كان قمة فى الروعة ودخل على صوت الراجل بمزيكا حزينى ملهاش اى لزمة
وكان المشهد متاخد من كذا زاوية ولا كانو مسلسل تركى بجد عاملين مأساه بنى ادم دعايه لاستعطاف الناس علشان تتبرع على حساب برنامج بكره احلى .. انا مش بقول ان احنا منتبرعش انا بقول ان هما مكنش ينفع يستخدمو موسيقى تصويرية على كلام الراجل علشان يصعب علينا .. ولا عمرو خالد كان المفروض يمثل كده ... عموما انا جايب الفيديو للناس المشفتش الحلقة
ياريت تتفرجو من اول الدقيقة 3:14
-------------------------------------------------------
اخر حاجه انا حسيت من تقرير العشوائيات ان التقرير معمول بالطريقة دى وعمرو خالد كان بيمثل ومش على طبيعتو علشان يشهر البرنامج .. زيها زى خبر عدم قبول التلفزيون لدخول الدكتور البرادعى لحضور البرنامج مع عمرو خالد .. وبعدها بدقائق تم نشر على صفحة عمرو خالد على الفيس بوك ان التلفزيون رجع ف كلامو .. مع ان انا اعتقد ان الحقيقة ان دى كانت تمثيلية علشان يتم جمع اكبر عدد من المشاهدين .. انا واحد من الناس مكنتش اعرف عن برنامج بكره احلى ده .. الا لما سمعت عن الوقفة الهاتتعمل قدام ماسبيرو علشان البرادعى مش هايظهر فى التلفزيون المصرى.. اعتقد ان كل البيحصل ده نوع من الدعايه الرخيص جدا للبرنامج
-------------------------------------------------------------------------
نيجى بقى للايجابيات الشفتها
اولا تقرير العشوائيات اكثر من رائع وجايب نماذج من الناس بجد حاجه تشرف بغض النظر على الموسيقى التصويرية والكلام الفاضى ده .. بس حاجه تشرف بجد ..
ثانيا الاستاذ عمرو خالد جايب العشوائيات من وزاوية مختلفة تماما عن الى كلنا متعودين نشوفها بيها جايب النماذج الناجحه فى العشوائيات
ثالثا عمل مساعده للناس الهناك بجد ربنا يجازيه خير هو وكل الساعد فى شراء عربية الكسح للناس الغلابة الى هناك دول
رابعا عمل فصول محو الامية هناك بجد مشروع ممتاز وانا شخصيا هحاول ان شاء الله اشترك فيه فى الصيف
---------------------------------------
عموما ربنا هو العالم انى بهاجم من منطلق حبى لعمرو خالد وبردو انا زى مذكرت السلبيات ذكرت الايجابيات بردو
عموما ربنا يجازيه خير عن المجهود البيعملو ويديه على قد نيتو ان شاء الله
ياريت اى حد عندو استعداد يتبرع لبكره احلى
ده رقم الحساب : 555666/7 البنك المركزى
جزاكم الله خير
والسلام عليكم ورحمة الله وبركاتة
0 التعليقات:
إرسال تعليق