9:07 م
السلام عليكم ورحمة الله وبركاتة
انا هاتكلم بالعاميه علشان يكون الموضوع واضح ومفهوم لكل الناس
باختصار انا عاوزك تفكر معايا شويه فى الكلام الهتشوفو دلوقتى
انا فى حجات كتير اوى اوى فى دماغى بس مش عارف ابدا منين بس خلينا نبدا من تحت لفوق
الاول احداث الفتنه الى بتحصل فى مصر فى الوقت الحالى
انا بناشد شعب مصر وبقول شعب مصرى وهافضل اقول شعب مصر انا بناشدكم كلكم ان يكون ليكم دور فى الوقوف ضدد الفتنه البتحصل والسببها هو ان فى جهات غير مصريه وانا متاكد من الكلام ده مش عاوزه مصر تقف على رجلها تانى
هاقلكم ايه الخلانى افكر فى الكلام ده واقول قوى خارجيه والكلام الكبير اوى ده
الموضوع ببساطه لو جينا نقول اذيال النظام السابق ؟؟
هنلاقى ان ده مش فى مصلحتهم لسبب بسيط هما ممكن يكون عاوزين يعملو فوضى لكن فتنه معتقدش هما هدفهم ان الشعب يقول ولا يوم من يومك يا مبارك علشان يقدرو يرجعو تانى ويكون ليهم شعبيه
لكن لو عملو فتنه الفتنه مش سهل ابدا السيطره عليها ومعتقدش انهم هايعملو فتنه عشان يمسكو البلد تانى
الحاجه التانيه امن الدوله؟؟؟
فى الوقت الحالى لا يوجد ما يسمى امن الدوله لقد تمت سيطره القوات المسلحه على جميع مقار امن الدوله وتم التحقيق مع جميع قيادات هذا الجهاز
اليثبت كلامى انها اجندات خارجيه هو
اولا سبب انهم عاوزين يعملو فتنه انهم مش عاوزين مصر تبقى دوله ليها صوت وكلمه مسموعه بمعنى اصح مش عاوزين يكون فى ايران تانيه او تركيا تانيه عاوزينا نفضل متخلفين وناس متحكمه فينا
ثانيا محدش فكر ليه الاماكن الحصلت فيها مشادات بين المسلمين والمسيحين اماكن مستوى المعيشه بها منخفض؟
اقلكم انا ... السبب ان الناس الهناك معظمهم مش مكمل تعليمه او جاهل فسهل التأثير عليه عقليا وماديا
منطقه زى منشيه ناصر اكيد كلنا عارفين انها معظمها بلطجيه وتجار مخدرات ومسجلين خطر ومرتزقه
ودول سهل جدا السيطره عليهم ماديا والناس دى علشان الفلوس ممكن يبيعو ولادهم
كل الاحداث دى بتثبت ان فى ايدى خارجيه تلعب بامن وسلامه المصريين
انهارده الجيش اضطر لاخلاء ميدان التحرير بعدما ثبت اعمال بلطجه واعمال مخله بالاداب داخل الخيم فى الميدان وساعد الجيش فى اخلاء الميدان بعض من الثوار الاصليين المشيو اصلا من الميدان يوم الجمعه
انا البطلبو دلوقتى انا عاوز اسمع ارائكم فى الاحداث وايه افكاركم للخروج من هذه الازمه وشايفين مصر رايحه على فين فى الكام شهر الجايين؟؟
