انهارده قررت انى اكتب عن ميدان التحرير وما يحدث بداخل ميدان التحرير لسبب بسيط اوى
ان البيحصل واللى انا بشوفو ده مش صح ومش ده اللى المفروض يحصل
انا هحاول اختصر كلامى على قد مقدر نبدا اولا
بوصف المشهد ككل للناس اللى منزلتش الميدان
لو دخلت من اى مدخل من مداخل ميدان التحرير اولا
هايقبلك واحد او اتنين هيسألوك عن بطاقتك ولو معاك شنطة هايطلبو منك انك تفتحها
ولو نزلت فى معاد الظهر مثلا احتمال ضعيف جدا انك تلاقى حد واقف اصلا ودى اول غلطة المهم
هاتعدى منهم وتدخل هتلاحظ اول حاجه هاتقع عينك عليها هى
الخيم والافتات المتعلقة فى كل مكان والاكيد انك هتلاخظ الخيم ودى مش حاجه جديده اكيد كلنا شفناها قبل كده واكيد فى مننا اللى كان نايم فى واحده منها فى اول الثورة
الجديد انك هتلاقى ناس فى الميدان نفسو مسئولة عن الامن الناس دى لو شافو اى حد اسلوبو مريب او شكلو غريب بيوقفوه بكل احترام ويسألوه عن البطاقة وكده ولو لقو اى حاجه معاه بيتاخد للامن الموضوع ده كويس جدا بس فيه مشكلة واحده بس
ان اى حد ماشى فى الميدان ممكن يوقف اى حد تانى ويشوف بطاقتو بمعنى اصح العملية محتاجة تنظيم اكتر من كده
ده المشهد بالكامل للناس المنزلتش التحرير من يوم الجمعة 8 يوليو 2011 لحد انهارده
=======================================
نيجى بقى للملاحظات اللى انا شفتها واللى خلتنى اكتب انهارده الموضوع ده
=======================================
اولا :
موضوع الخيم الخصوصى دى .. بمعنى انك لوبصيت على الخيم فى ميدان التحرير هتلاقى كل خيمة مكتوب عليها اسم حزب يعنى فى خيمة خاصة بشباب 6 ابريل .. وخيمة تانية خاصة بأتلاف الثورة وخيمة مقر حزب بداية وهكذا كل الاحزاب المشاركة فى الاعتصام كل حزب عامل خيمة خاصة وكاتب عليها اسمو والحقيقة بقى ان مش الاخزاب بس .. دى فى خيم بس مش فى الميدان نفسو قبل الميدان قصاد كنتاكى فى الجزيره اللى فى نص الشارع .. هتلاقى خيم المحافظات..يعنى مثلا بدو سيناء ليهم خيمة.. محافظة دمياط اعتقد ليهم خيمة .. من الاخر كل حزب استغل الخيمة بتاعتو لعمل اعلان عن الحزب ودى الصور ((مصدر الصور موقع مصراوى))
اخر حاجه قبل مقفل موضوع الخيام
فى يافطة كبيرة فى الميدان متعلقة مكتوب عليها ميثاق التحرير
اليافطة دى مكتوب فيها بالتفصيل
(((أملا منا في استعادة روح ميدان التحرير التي أشاد بها العالم أجمع، نتعهد بالالتزام بهذا الميثاق والذي يشمل الحرص علي استعادة أخلاق وروح الميدان من وحدة وترابط وتغليب للمصلحة الوطنية علي المصالح الحزبية والشخصية، وعدم رفع أية لافتات حزبية أو ائتلافية أو أية جماعات أو مؤسسات والتركيز علي المطالب التي عليها توافق من الجميع وعدم رفع أي مطالب خلافية)))
لكن الواضح ان ميثاق التحرير ده الكتبو يروح يبلو ويشرب ميتو علشان كل الاحزاب الى انا كنت فاكر انها محترمة ابتدت تدور على مصلحتها الخاصة وعلى شهرتها وعلى نفوذها وكما قلت سابقا ((لقد تنحى ديكتاتورا" كبيرا ليظهر لنا دكتاتوريين صغيريين))
كل الاحزاب اللى كانت بتقول انها عاوزه ديموقراطية وعاوزه مصلحة المواطن البيسط كلهم بيدورو على مطالبهم الشخصية
واكبر حزب اتخدعت فيه هو 6 ابريل .. اكيد هاتقولو ليه اقلكم انا ليه
البشوات الصغيرين بيعملو اللى انا كنت خايف منو
راحو لعصام شرف وسلموه بقائمة باسماء الوزراء اللى عصام شرف يستبعدهم عن الوزاره .. دى مش مشكلة
المشكلة انهم اجتمعو هما وعصام شرف ....و 6 ابريل رشحت اسماء معينة لعصام شرف علسان تبقى موجوده فى الوزاره بالاضافة الى انها بتجهز قائمة بالمحافظين اللى 6 ابريل شايفة انهم يغيرو وقائمة تانية بالناس اللى يمسكو مكان المحافظين
سؤال يطرح نفسو؟؟؟
هو رأى الشعب فين؟؟؟
هو الشعب كلو بقى 6 ابريل ولا ايه؟؟
ولا 6 ابريل بقت بتتكلم باسم الشعب؟؟
للاسف زى مقلت لكم قبل كده خلصنا من واحد كبيرررر .. طلع لنا زيو بس لسة صغيريين على قدهم
ده مصدر الخبر بتاع وزراء 6 ابريل علشان محدش يقول عليا كداب ((مصدر الخبر))
ما علينا ده بالنسبة للخيم
=======================================
نيجى للافتات المعلقة فى الميدان وهو ده السبب الرئيسى فى كتابتى للموضوع ده
كل حزب وكل ااتلاف عامل يفط خاصة بيه وكاتب علي كل يافطة طلب ومنتشره فى الميدان كلو
يعنى مثلا فى ناس بتطالب بحق الشهداء
وناس تانية بتطالب بمجلس رئاسى مدنى
وناس تانية بتطالب باقالة المجلس العسكرى
وناس تانية بتطالب بالدستور اولا
وناس غيرهم بتطالب بعلانية المحاكمات
الخ الخ الخ الخ
ودى صوره للناس البتطالب بالدستور اولا
طيب انا عاوز اقول ايه فى الاخر بعد الرغى ده كلو ..؟؟
هاقلكو انا هدفى ايه بس ياريت تشوفو الصور دى الاول وانتو هاتعرفو انا هدفى ايه
الخيام ايام اعتصام 25 يناير
المطالب ايام 25 يناير
(النتيجة)
=========================================
=========================================
اكيد وصل لكم انا هدفى ايه من الموضوع
يعنى لما الميدان كان بتاع كل المصريين والخيم كان للكل والاخوانى كان بينام جنب 6 ابريل ومكنش فى فرق بينهم
ولما كان لينا طلبات محدده وكتبناها بخط كبيررررر وعلقناها قدام الكل ومكنش فية فى الميدان كلو اى طلبات غيرها
لما كنا الناس دى ايام 25 يناير ====> كانت النتيجة ان احنا نجحنا
لكن تخيلو معايا الموقف ده
كل حزب ليه خيمة خاصة بيه وكاتب عليها اسم الحزب
وكل حزب وحركة وااتلاف ليه مطالب غير التانية
وكل يفطة فى الميدان مكتوب عليها مطلب شكل وباسم حزب شكل
تفتكرو هاتبقى نتيجة الكلام ده كلو ايه؟؟
خلاصة الكلام
لازم الهبل البيحصل فى الميدان ده يخلص
لازم كل الناس تتجمع على مطالب محدده
لازم كل اعلانات الاحزاب دى تتشال
لازم يتعلق يافطة واحده بس فيها المطالب الرئيسية الى موافق عليها كل الناس
وعرضها
مينفعش كل حزب يبقى ليه اتجاه معين
مصلحة البلد فوق مصلحة اى حزب
لو فعلا مش عاوزين دم الشهداء يروح هدر لازم نتجمع من تاني ونتجمع فى كل حاجه من اول الخيم لحد المطالب
مينفعش البيحصل فى الميدان دلوقتى ده خااااااااالص
البيحصل ان كل مجموعة معتصمة حتى تنفيذ المطالب اللى هيا عرضاها
يعنى ان شاء الله لما المجلس العسكرى وعصام شرف ينفذو المطالب الى كلنا عارفينا واللى عصام شرف وعد انو هاينفذها
هتلاقى ناس فضت الاعتصام وناس تانية لسه
وكل ده علشان كل واحد فيهم ليهم طلب
ياريت نفوق شوية ونركز على المطالب الاساسية لينا