الاعتصامات والمظاهرات تتحدى هيبة الدولة.. والثورة تقسم الشعب المصرى الى وطنى وخائن

كتب بواسطة Msry 7or في 6:44 م 1 تعليق

انهاردة انا بكتب بعد بجد مالقيت ان الموضوع ذاد عن حدو  وحصل الى كنت متوقع انو يحصل 

اكيد كلنا شفنا الاحداث الحصلت خلال ال4 ايام الفاتو

بدايه من التعدى على قسم شرطة الازبكية ونهايه باعتصام اليوم امام ماسبيرو

نبدا بموضوع قسم الازبيكة 


الحقيقة انا لغايه دلوقتى مقدرش اعرف مين الغلطان لانى مش مصدق ولا واحد من الطرفين 
انا شفت الفيديو بتاع مأمور القسم وفى حجات صدقتها وحجات مصدقتهاش وشفت فيديوهات الشهود الكانو حاضرين الحادثة وفيها منها البيأكد كلام المأمور وفى منها البينفع وبيقول كلام تانى
عموما فى الحالتين الموضوع غلط 
هانفرض ان المأمور غلطان وفعلا قتل واحد جوه بسبب التعذيب 
يبقى هل من الطبيعى دلوقتى ان احنا اى حاجه تحصل نقوم ونروح ناخد حقنا بدرعنا ولا ايه ..ده على اساس ان احنا عايشين فى غابه مثلا
اكيد لا المواطنين غلطانين انهم راحو وتعدو على قسم الشرطة وحرقو العربيات .. وبصراحة حقهم يعملو اكتر من كده مهما متاكدين ان محدش هايكلمهم ولا حد هايقولهم حاجه لانهم بينتقدو الشرطة وعارفين ومتاكدين ان الشعب كلو هايقف وراهم ضد الشرطة فلازم كانو يعملو كده واكتر من كده كمان..ده بالنسبة للمواطنين
اما بالنسبة لمأمور القسم انا من رأى ان هو المفروض كان اول محلصت المشكلة كان يبلغ القوات المسلحة علشان تيجى وتحل الموضوع قبل ميتطور وعلى كلام المأمور انو راح وكلم الراجل باحترام وكان هو والسواق بتاعو دى انا مش داخلة دماغى خالص لان مأمور القسم قبل ميجى القسم بيبقى كل العساكر والظباط عارفين انو فى الطريق وبيطلعو كمان يستنو بره القسم ..هانفرض يا عم انو مكنش قايل لحد.. اكيد كل العساكر عارفين العربية بتاعت المأمور يعنى لو هو اول مجه وحصلت المشكلة ده كان اكيد الظباط والعساكر خرجو ..سيبكم بردو من دى كمان .. اكيد من الطبيعى جدا ان اى خناقة او تجمع قريب من القسم اكيد القسم بينزل ظباط علشان تشوف ايه المشكلة كل ده بيكذب كلام مأمور القسم ان هو كان واقف لوحدو وان سواق المكروباص اعتدى عليه بالضرب قام المواطنين مسكوه ضربوه
عموما بقى وبعيدا عن كل ده الحاجه الى انا متاكد منها ان سواق المكروباص غلطان لسبب ان انا متاكد انو كان واقف فى نص الشارع بيحمل انا بقالى اكتر من 3 سنين بعدى كل يوم من قدام القسم وكل يوم بلاقيها زحمة بسبب ان سواقين المكروباص سايبين الموقف المخصص ليهم وواقفين بيحملو ده غير سواقين السفر البيحملو دمياط والمحلة واسكندرية كل دول واقفين 24 ساعه بيحملو ومش هاممهم اى حد لان بتوع المرور بياخدو منهم مصلحة وطبعا كل البيحصل ده بسبب ان هيبة الشرطة بقت زبالة 


نيجى بقى للاعتصامات والمظاهرات:


انهارده ذكرى وفاه خالد سعيد وكانت صفحة خالد سعيد عامله وقفات صامتة فى اماكن مختلفة فى محافظات مصر 
فى القاهره كانت والقفات متحدده على كورنيش النيل 
فجأه وبدون اى اسباب ولا مقدمات الناس راحت وحولتها مظاهره امام وزاره الداخلية ممكن اعرف ايه السبب
الوقفات دى علشان الناس تنزل تقرأ قران على روح خالد وعلى الشهداء وتدعي وكده مكنش فى اتفاق خالص على التظاهر عند وزاره الداخلية ... عموما مش مهم على الاقل مكنوش وقفين فى نص الشارع ولا كانو بيحرقو 
نيجى بقى للمظاهره التانية 


بعد انتهاء ازمة اعتصام اهلى المنيا على سكك الحديد واخضاع الحكومة لطلباتهم الى مكنش لازم يتم تلبيتها الا لما يتفض الاعتصام  لانهم كده فقدو هيبتهم مع انى مع ان المحافظ يمشى بس انا مش مع لوى الدراع المهم بعد ازمة المنيا 

اخونا بتوع العياط اعتصمو انهارده على سكة قطر العياط تفتكرو اعتصمو ليه؟؟
علشان مش لاقين يكلو؟؟     لا
علشان عندهم مشكلة مع المحافظ؟؟  بردو لا
علشان انبوبة الغاز؟؟  لا بردو


طب علشان ايه؟؟؟


الناس اعتصمت علشان موضوع اخطر من كده بكتيرررررررر اوى 
اعتصمو علشان معترضين على انشاء محطة تقوية لشبكة محمول 
ينهار ابيض ايه ده ده بينو موضوع خطير جدا 
المهم الناس اعتصمت هناك وفضلو معتصمين علشان محطة تقوية الارسال التم انشائها مش عجباهم 
بعد كام ساعه انتهى الاعتصام بعد طبعا مالحكومة خضعت تانى وفقدت هيبتها تااااااااااااااااااااانى وامرت بازاله محطة تقوية شبكة المحمول <<<< اظاهر كانت تبع نجيب ساويرس :D

المفروض الناس دى كان يتم تطبيق قانون منع التظاهر المعطل لمصالح الناس علشان هما كانو معطلين حركة سير القطار وده بالتالى بيعطل مصالح الناس  بس الحكومة طبعا خافت من الرأى العام وقالت تنهى الموضوع وخلاص ومش عارفين انهم كده هيبتهم راااااااااااااااحت


نيجى بقى لاخر تظاهر وده بجد الى نكتة
بس قبل مكتب التظاهر كان بسبب ايه وكان مكانو فين هاكتب خبر لسه جايلى دلوقتى 


الخبر بيقول ان الباعة الجائلين تعدو على رئيس مباحث فى الاسكندرية
لا حول ولا قوه الا بالله 
الخبر ده لو بيدل على حاجه فده بيدل على ان الشرطة لازم لازم لازم تتعامل بحزم مع اى حد يخالف القانون علشان ترجع هيبتها تانى


نرجع بقى لاخر تظاهر وهو شوية ناس من منشية ناصر وراحو قدام ماسبيرو وتظاهرو بيطلبو بايه بقى؟؟


بيطالبو بشقق 
يعنى من الاخر يا تسلمونا شقق يأما مش هانتحرك من هنا بيفكرونى بناس اصحبنا عملو زيهم كده بس مكنوش عاوزين شقق 
طيب على كده بقى اى واحد او واحده عاوز يتجوز يطلع على ماسبيرو ويطلب وانا اضمنلو لو جاب معاه عدد كبير واعتصم هناك كام يوم انا اقدر ااكدلو ان هايتم تنفيذ طلبو فى الاخر
_____________________________________

كلام بجد بقى 

لو حد فكر ولو لثانية هيكتشف ان شعب مصر اتحول الى

1- شباب الثورة وهما طبعا الحركات السياسة ووائل غنيم لكن اى حد تانى نزل فى الثورة ملوش اى لزمة ..<<< دول عاوزين مصلحة البلد وكلامهم كلو صح ولازم يتسمع بدون اى نقاش والا هاتبقى فلولو حزب وطنى او خاين او بيحب مبارك


2- اخوان مسلمون ودول طبعا بالنسبة لى غامضين ومش عارف هدفهم ايه بظبط..<<< بس دول اوعى تقرب منهم لحسن عاوزين مصر دولة دينية وعاوزين يقطعو ايد البسرق ويقطعو راس البيقتل ويخلو بنات مصر كلهم يلبسو الحجاب حتى المسيحين كمان


3- الــــشــــــــرطـــــــة  <<< دول كوخة يع محدش يسمع كلامهم ولا يقربلهم علشان هما دول القتلو اخوتنا فى الثورة مع ان فيهم ناس محترمة بس لا متسمعش كلامهم ولا تحترمهم واى حد يكلمك منهم حط صباعك فعينو ومتخفش هتلاقى شعب مصر كلو وراك وبيحميك حتى لو كنت غلطان

4- الســــلــفــيين <<< دول بقى البيشيلو اى مصيبه تحصل فى البلد اى حاجه تحصل يبقى بسبب السلفيين واى حد يبقى مربى دقنو ولابس جلبية  يبقى سلفى .. خلى بالكو محدش ينزل يوم الجمعة بالجلبية خصوصا لو مكنتش حالق دقنك  دول البقى ملطشة وكان قبلهم بلطجية الحزب الوطنى الكان اى خناقة تحصل فى البلد كانت بتبقى بسببهم وقبل بلطجية الحزب الوطنى كان الاخوان المسلمين ايام مبارك هما الملطشة كان اى حاجه تحصل فى البلد يبقى سببها الاخوان ... انا حاسس ان البلد دى لازم يبقى ليها شماعه نعلق علشها اى حاجه وحشة 


5- الــحــكـــومـــة <<< دول بقى غلابة ومش عارفين يعملو ايه وكل ميخلصو من مشكلة يطلعلهم الف مشكلة تانيه والدكتور عصام شرف الحقيقة انسان محترم وطيب جدا لدرجة انو بيصعب عليه انو يقول لاى حد لا ... اكيد مينفعش يقول لا لحد علشان لو قال لا هايبقى معادى للثورة 


6- القوات المسلحة <<< دول بقى بجد الى صعبانين عليا المجلس العسكرى ناقص يحلف على المصحف انو مش طمعان فى الكرسى والناس بردو مش مصدقة وناقص يحلف ان مبارك موجود لسه فى شرم والناس مش مصدقة بردو وبتقول انو هرب ..طيب يعمل ايه؟؟


7- بقية الشعب <<< دول بقى البياخدو اخبارهم من الشارع ومن الجرايد والتلفزيون وبيتأثرو بكلام اى حد فى منهم البيفكر وبيكتشف ان فى كلام غلط بس بيخاف يقول لحسن يتقال عليه من الفلول وفى منهم البيصدق والبيصدقو اى حاجه دلوقتى كتيررررر اوى للاسف 


فى الاخر كل بنى ادم فى مصر لازم يكون مع واحد او اتنين من الطوائف الى فوق دول 

وخلاصة الكلام 

للاسف الشديد جداااااااااا جداااااااااااا 

ان الحركات السياسية زى 6 ابريل وكفاية ووائل غنيم والناس دى كلها بقى اى حد مش معاهم وموافق على افكارهم ..يبقى ضدهم ولو اى حد بقى ضدهم يبقى بالتالى بقى ضد الثورة وضد مصر ... للاسف تم اختزال الثوره فى بعض الناس البقو متحكمين فى تخوين الناس وتحديد مين وطنى ومين لا 

انا خلصت كلامى وفى الاخر عاوز اقول ان كلامى ده بيعبر عن وجهه نظرى الشخصية وعن تفكيرى انا الشخصى واكيد فيه الهايعجبو الكلام ده وفيه المش هايعجبو وده شئ طبيعى

وشكرا