عفوا نواره نجم , انا لست ضيفا في بلدي

كتب بواسطة Msry 7or في 10:30 م بدون تعليقات

كان لازم اكتب انهارده عن يوم 8 يوليو  الى بعض الناس سمتها ثوره الغضب الثانية

وبعض الناس التانيه سمتها الدستور اولا, والبعض الاخر ثوره الفقراء اولا , وناس تانيه خالص سموها جمعة الشهداء 

الحقيقة انا هاسميها اسم تانى خالص 

"جمعة الاتحاد"

ايوه الاتحاد .. اكيد كلنا ملاحظين ان فى الفتره الاخيره كل حركة سياسية او حزب سياسى ابتدو كل واحد فيهم ياخد جنب 

وكل واحد دخل الاوضه وولع اللمبه الحمرا وابتدى يخطط  فيهم بقى البيخطط علشان يمسك 50% من مجلس الشعب زى حزب المصريين الاحرار والكلام ده قالو ساويرس بنفسو .. قال حزب المصريين الاحرار بيسعى للاستحواز على 50% من مجلس الشعب

وفى احزاب تانيه بتخطط انها ازاى تعمل لنفسها شعبية كبيره بين الشعب المصرى.. 

وفى اشخاص بقى تبع نفسهم للاسف مشهورين اعلاميا دول بقى عاوزين يطلعو فى الصوره بأى شكل عن طريق بقى انهم يسخنو الناس على اى موضوع وده طبعا عن طريق انك فى اى مشكلة بتحصل فى البلد تلاقيهم ناطيين فيها وعلطول يبدأو يتكلمو فى القنوات الاخباريه على الهواء  .. ويهولو من المشهد ويبدا الشتيمة والاهانة اكيد مش فى الشعب .. فى الحكومة حتى من قبل ميعرف فى ايه..

وناس تانية بردو هم الى ورا فكره الدستور اولا والكلام التعبان ده

طيب يبقى لازم يوم الجمعة الجاى ان شاء الله تبقى جمعة الاتحاد علشان كل الناس لازم ترجع مع بعض تانى لغايه ميتم تنفيذ طلبات الثوره ((((الاصلية)))))

واخدين بالكو من الاصلية دى ... يعنى منعملش زى الاستاذه نواره نجم البتطالب بأن مطالب يوم الجمعة القادمة تكون كالاتى

 ==================================================
 انا هاكتب كل طلب هى طالبت بيه وهاكتب تعليقى عليه بالون الاحمر
==================================================

1- كل اللواءات اللي اشتغلوا ايام العادلي يتم اقالتهم (طيب هل كل الواءات دول فاسدين وكلهم ادو اوامر بضرب المتظاهرين, لازم يكون كلامنا منطقى علشان يتم تنفيذه,ممكن يكون الطلب بان يتم فصل جميع الواءات التم اثبات تورطهم فى قتل الشهداء)

2- سحب القنابل من الشرطة.. شرطة ايه دي اللي معاها قنابل (اى شرطة فى العالم لازم يبقى معاها قنابل ,قنابل صوت وقنابل غاز وقنابل ضوء كمان .. هو حلو للعالم كلو ووحش لمصر ولا ايه؟ المفروض الطلب يبقى عمل قوانين معينة لاستخدام القوه المفرطة للشرطة)

 

 3- عساكر الامن المركزي يرجعوا الجيش والامن المركزي يتقسم وحدات مكافحة شغب ويبقى سلاحه شوية عصيان وطلق صوت بالكتير قوي، والعصيان ما تبقاش كهربا كمان(انا معاها فى الطلب ده بس اكيد وحدات مكافحة الشغب مينفعش يبقى سلاحها شويه عصيان وطلق صوت , دى مكافحة شغب يعنى لازم تبقى مجزهة بكل حاجه بحيث لما تستخدمها ضد الشغب تجيب نتيجة واكيد محدش من مثيرى الشغب هايخاف من طلق صوت وعصيان.. ولا ايه؟؟

4- الامن الوطني يتحل.. كل اللي اشتغلوا في امن الدولة ما يشتغلوش تاني في الشرطة اصلا، هم دول نافعين ببصلة؟(الاول كان مطلبنا اننا نحل امن الدولة وفعلا تم تنفيذ المطلب وتم حلة وتحويلة الى جهاز الامن الوطنى , انا عارف ان لسه فى ناس داخل الجهاز ده ماشية بالاسلوب القديم .. يبقى المفروض اعاده هيكلة جهاز الامن الوطنى مش احلاله.. هى ذكرت فى باقى المطلب وقالت ياريت محدش يقولى انهم هايكونو عصابات علشان هما اصلا عصابات ومعاهم سلطة يبقى لما يبقو عصابات معهاش سلطة هايبقو عصابه خايبين.. احب اقول ده بالعكس الناس دى ممكن يكونو بيعملو شغل عصابات بس بيعملوه لخدمة شخص .. فتخيلى بقى ممكن يعملو ايه علشان ينتقمو من الشعب علشان نفسهم هما؟؟
على الاقل الناس دى لو حد فيهم عمل حاجه ممكن يتجاب بسهولة لانهم معروفين 
ولى رأى المثل اجعل اصدقائك قريبين ... واعدائك اقرب  .... يبقى المفروض الطلب يبقى اعادة هيكلة الامن الوطنى

5- القناصة (هى بتقول ان مينفعش يبقى فى قناصة علشان هما بيقتلو فى الشعب... ردى .. مينفعش يتم الغاء القناصة بردو ممكن يتم وضع قوانين زى مقولت فوق .. قوانين تشرع الوقت الممكن يتم فى استخدام سلاح القنص)

6- يغيروا لبسهم... ده بقى مطلب شعبي.. واهالي الشهدا انا اتكلمت معاهم وهم مش طايقين يشوفوهم بلبسهم ده، مش قادرين، كل ما بيشوفوا البدلة دي بيتجننوا وتجيلهم هيستيريا

واهالي الشهدا هم اصحاب البلد دي (بصراحة مش لاقى تعليق اقولو ..هاتفرق يعنى فى لبسهم .. ولا هو فرض راى وخلاص؟؟)

7- ودي اهم نقطة: كل من اصدر امر بضرب المتظاهرين، وكل من اطلق النار على المتظاهرين يتم التحفظ عليه فورا، لانهم بيروحوا يهددوا اهالي الشهدا، وبيقولوا لهم حندفع على الراس ميت الف جنيه، يا اما ابنك التاني ده مش حتعرف له طريق جرة (معاكى 100% فى المطلب ده ..وكما اى حد يبقى مشكوك انو متورط فى قتل المتظاهرين يتم التحفظ عليه )

8- امبارح زياد العليمي اقترح ان يبقى فيه جهة قضائية مختصة بشكاوى المواطنين ضد الشرطة (اقتراح رائع بجد وياريت يتنفذ)

 =============================================

تعليق عام

 انا مع ان جهاز الشرطة محتاج اعاده هيكلة بس الطلبات بتاعت الاستاذه نواره من وجهه نظرى الشخصية

طلبات سطحية تفتقر الى اهم عنصر وهو هل ينفع الطلبات تتفذ بالشكل ده؟؟ يعنى مثلا عساكر الامن المركزى الى هايبقى مكافحين للشغب ميبقاش معاهم عير عصيان ومسدسات صوت؟؟  اعتقد ده كلام سطحى جدا

مشكلة الشرطة كلهااااااااااااااااااااا تتلخص فى "اعاده هيكلة جهاز الشرطة"

بمعنى كل الطلبات الفوق دى اختصارها المفروض اعاده الهيكلة وسن قوانين لاستخدامات الشرطة بمعنى ان مثلا استخدام القنابل المسيلة للدموع يجب ان تكون لها شروط لو الشروط دى كلها تطابقت على موقف معين يبقى سعتها يتم استخدام القنابل المسيله للدموع وهكذا على كل حاجه فى الشرطة

العقل بيقول كده   واهم شئ فى الكلام ده كلو ان الطلبات دى مش وقتها الجمعة القادمة خااااااالص

الجمعة الجاية دى المفروض طلبتنا تبقى واحده وبالمناسبة الطلبات فيها حق الشهداء واهاليهم

لكن هيكلة الشرطة دى ممكن يتعمل مشروع ويتم تقديمة لمجلس الوزراء او المجلس العسكرى

ولو متمش تنفيذه سعتها يبقى ندعو لمليونية او ثوره حتى

الجمعة القادمة هى جمعة الاتحاد .. 

الاتحاد علشان مصلحة البلد

الاتحاد علشان الثوره

الاتحاد علشان حقنا

الاتحاد علشان شهدائنا

الاتحاد علشان مصر

لكن مينفعش نلاقى يوم الجمعة فى التحرير مثلا كل مجموعة من الناس رافعه مطالب شكل 

ناقص كل حزب ياجر جزء من الميدان ويعمل منصه وكل واحد فيهم يطالب بالهو عاوزو ... 

اخر حاجه ومعلش انا عارف انى طولت فى الكلام اوى 

بس اخر حاجه احب اعلق عليها على كلام للاستاذه نواره

الاستاذه نواره بتقول....

=====================================

اللي بيدفع ضرايب بيطالب بحقه في البلد... اللي بيدفع ابنه ولا اخوه ولا ابوه ولا جوزها دول اصحاب البلد اصلا واحنا ضيوف عليهم، واللي دافع عينه ولا رجله ولا اي اصابة سببت له عاهة مستديمة ده صاحب البلد دي واحنا ضيوف عليه، صحاب البيت اللي دافعين فيها دم هم اللي يحددوا شكل الستاير والانتريه واودة النوم ولون الحيطة وعايزين الشبابيك شيش ولا الوميتال.. البلد دي بلدهم هم، واي فتافيت تتبقى منهم يوزعوها زي ما يحبوا واحنا نبوس ايدنا وش وضهر ونشكرهم على كرمهم

=====================================

شهداء الثوره واهاليهم على رسنا كلنا من فوق ومحدش يقدر يقول غير كده 

بغض النظر عن تشبيها لمصر على انها شقه .. انا معترض على حاجه واحده ان اهلى الشهداء هم اصحاب البلد

لا معلش انا كمان صاحب البلد واى حد شارك فى الثوره هو كمان صاحب البلد وليه حق فيها وليه حق انو يختار الستاير والانترية واوضه النوم كمان ... بردو هانرجع تانى ونحاول نقسم شعب مصر جزئين .. لا كلنا اصحاب البلد كل الشارك فى الثوره اصحاب البلد والناس الى ربنا رزقها بالشهاده دول محظوظين علشان ربنا اختارهم انهم يموتو شهداء لكن انا وكتير غيرى شاركو فى الثوره ومن اولها كمان وللاسف فى مننا كتير متصبش ولا استشهد يبقى احنا علشان محدش فينا خد رصاصة او مات نبقى ضيوف .. ونلم الفتافيت الى بتقع من اهالى الشهداء والمصابين

ونبوس ادينا وش وضهر كمان .... لالالالالالالالالالالالالا احنا زينا زى اى حد فى الشاركو فى الثوره .. لينا حق فى الكلام ولينا حق فى اختيار اى حاجه ولينا حق الاعتراض على اى حاجه مش عجبانا .. وانا بكررها تانى انا مش ضيف عند حد انا صاحب البلد دى وزى مقولت بردو اهالى الشهداء على رسنا من فوق وانا مستعد اضحى بنفسى علشان اجبلهم حقهم كمان واى واحد غيرى بردو مستعد يضحى بنفسو علشان يجيب حق الشهداء وحق اهالى الشهداء ... لكن انا فنفس الوقت مش ذنبى ان محصليش حاجه .. خلاصة الكلام مينفعش نقسم الشعب على انو اصحاب مكان وضيوف .. كلنا اصحاب البلد دى وكلنا لينا حق فى الرفض او الاتفاق على اى كلام يتقال .. محدش احسن من حد.  بردو كلامك تانى بيأكد انك مسحمسة وكلامك يعبر عن عدم المسئولية

==============================================

بردو الاستاذه نواره نجم قالت فى اخر موضوعها الى بعنوان(يوم الجمعة 8 يوليو...للداخلية ..بلطجية)

 ---------------------------

هذا نداء لكل مواطن: يا انت مع الشهدا يا انت مع الداخلية

----------------------------

هى دى الديموقراطية يا مصر ... من ليس معى فهو ضدى ...طيب انا ولا مع دا ولا مع دا انا مع مصر انا مع الثوره

انا مع مطالب الثوره الى عمالين بيتلكعو فيها انا مع ان حق الشهداء يجى وفنفس الوقت مع اعاده هيكلة جهاز الشرطة ومش مع الطلبات السطحية الى هى قالت عاوزها تعملها فى الشرطة.....

تفتكرو انا كده ايه؟؟؟  فولو ولا بلطجى ولا جاهل ولا اخوان ولا سلفى ولا حزب وطنى ولا مندس ولا ايه؟؟؟

=============================================

اخر 3 اسطر فى موضوع نواره نجم قالت فيه

----------------------------------------------------------

على فكرة.. تونس عينت ناشط حقوقي وزيرا للداخلية

يخربببب بييييييت الاجوان اللي عمالة تجيبها فينا... لا بقى.. يا حكم يا مرتشي، احنا نبات في الشارع وهم اللي ينجزوا؟ 

--------------------------------------------------

   
هو احنا ف متش كوره ولا ايه بظبط؟؟ هى بصراحة فكره كويسة جدا وانا عن نفسى اتمنى انها يتم تطبيقها فى مصر بس مش معنى انهم عملوها يبقى كده هما سبقونا وجابو فينا جون احنا مش فى سبق ولا فى ماتش كوره ياريت نخلينا فى بلدنا ونشوف احنا محتاجين ايه وعاوزين نغير ايه ...

=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-

خلاص خلصت واسف على الاطالة وبجد ياريت كل الينزل التحرير او اى مكان يوم الجمعة يبقى نازل علشان ينقذ الثورة مش علشان اى هدف تانى  الثوره اهم دلوقتى لازم نعرف العالم كلو ان احنا لسه موجودين ومتابعين ومش هانفرط فى ابسط حقوقنا تانى

شكرا

والسلام عليكم